?

Log in

No account? Create an account

Previous Entry

Торт Прага


На маю думку гэта далікатны торт. Такі сабе інтэлігент сярод тортаў - сціплы, але ведае пра сваю вартасць.
Корж вільготны, пругкі, смачны. А ў спалучэнні з шакаладнай глазурай і лёгкім крэмам атрымоўваецца "сімфонія шакаладнага захаплення".
За рэцепт дзякую chadeyka.

Для бісквіта спатрэбяцца 6 бялкоў, 6 жаўткоў, 150г цукру, 115г мукі і 25г какавы, 40г масла.



Змяшаць муку і какаву-парашок (калі сумесь будзе неаднастайнай ці ўвогуле іх не перамешваць, то ў бісквіце будуць сустракацца белыя плямкі ). Такія...


Растапіць масла (у мікрахвалёўцы ці іншым шляхам) і пакінуць яго астываць да пакаёвай тэмпературы.
Падрыхтаваць форму (23-24см) - высцяліць паперай для выпякання ці змазаць маслам і пасыпаць мукой.

6 жаўткоў ўзбіць з 75г цукру ў пышны светлы крэм.



6 бялкоў ўзбіць да такога вось стану ...

  

Дадаць астатнюю палову цукру.



Калі пачалі атрымоўвацца такія прыгожыя ўзоры - можна спыняцца. Гэтую стадыю называюць - стадыяй цвёрдых пікаў, бо калі дастаць венца миксера з бялкоў, то маса пацягнецца за ім і не ападзе.

Дадаць жаўткі ў бялкі і АСЦЯРОЖНа (няспешна, знізу ў верх) перамяшаць у некалькі рухаў.



Дадаць сумесь мукі з какавай, і ўсё так жа ж асцярожна перамяшаць у некалькі рухаў.



Цяпер дадаць 40г вадкага масла пакаёвай тэмпературы (наліваць трэба па краю). Асцярожна перамяшаць, і зараз ужо вымешваць да аднастайнаці, але (зноў такі) павольна і асцярожна. Сумесь крыху ападзе. Не трэба хвалявацца - так і павінна быць.
Калі прыглядзецца, то можна ўгледзіць масляную пенку па краю.


Выліць цеста ў падрыхтаваную форму, разраўнаваць.



Пячы ў папярэдне разагрэтай духоўцы, пры 200С - паўгадзіны.



Спечаны бісквіт патрымаць у форме 5 хвілін, далей перавярнуць на рашотку і пакінуць на 8 ці болей гадзінаў.

Рашотка патрэбна для таго, каб дно ў бісквіта не стала мокрым. А 8 гадзінаў патрэбны, каб корж "паспеў". З такім каржом прасцей працаваць - ён не смінаецца, меней крошыцца, лягчэй рэжацца.

Для крэма спатрэбяцца - 1 жаўток, 20г вады, 120г згушчонага малака, 200г масла, 10г какавы і пакецік ванільнага цукра.
Масла дастаць з лядоўні і пакінуць, каб стала мяккім.
У каструльцы змяшаць жаўток з 20г вады, і толькі пасля дадаць 120г згушчонага малака (такая паслядоўнасць неабходна, каб жаўток не згарнуўся).
Паставіць каструлку на невялікі агонь, старанна і бесперапынна вымешваць. Варыць, намагаючыся давесці яе да згушчэння. Калі хвалюецеся, што падгарыць - гатуйце на пару.



Астудзіць сіроп (накрыйце каструлку харчовай плёнкай ці вечкам, каб на сіропу не з'явілася плеўка).
Тым часам можна ўзбіць мягкае масла з ванілавым цукрам (тым самым, што з пакеціка).



Пасля састывання дадаваць сіроп у масла па сталовай лыжцы, кожнага разу ўзбівая міксерам. Дадаць парашок какавы (10г). Узбіць.



Какававы крэм гатовы.

Разрэзаць бісквіт на 3 часткі (даўгім нажом з пілкай ці грубай ніткай).
Крэм намазаць на два ніжніх каржа.
На верхні корж намазаць тонкім пластом джэм з абрыкосаў ці персікаў (ці любой іншай густой аднастайнай пастай, якая пасля нанясення яе на паверхнасць застыне). Зручна разагрэць джэм да стану цякучасці і паліваць верх бісквіта.

Пасля таго, як джэм застыў, заліць торт шакаладнай глазурай.
Для глазуры трэба растапіць 60г чорнага шакалада і 60г масла (у мікрахвалёўцы ці на пару), перамяшаць да гладкасці.
Заліць сумессю торт. Смела ліць на сярэдзінку торта і дапамагаць шакаладу раўнамерна сцякаць па-баках. Таму лепей, каб торт стаяў на рашотцы - збіраць шакаладныя падцёкі і кропелькі.
120г глазуры хапае заліць торт упрытык, можна ўзяць болей прадуктаў - у прапорцыі 100г шакалада і 80г масла.



Паставіць у лядоўню. Усё.
Смачна есці.